2006-12-21

La tuluza kantisto JoMo planas en 2007 rompi sian propran mondan rekordon pri multlingva kantado dum la brita Esperanto-Kongreso en Letchworth, norde de Londono. JoMo eniris Guinness Book of Records (Guinness-Libron de Rekordoj) en la jaro 2000 per koncerto de 22 kantoj en 22 lingvoj.

En majo 2007 li estos gastmuzikisto ĉe la Brita Kongreso de Esperanto, kiu okazos 60 kilometrojn norde de Londono en Letchworth Garden City (Ĝardenurbo Letchworth).

"Mi tre ĝojas pri la interkonsento", komentis loka esperantisto kaj prezidanto de la Loka Kongresa Komitato Arturo Sly. "La temo de la kongreso estas ‘Renoviĝo’, kaj kiel pli bone lanĉi renoviĝon ol per rompo de malnova rekordo?"

JoMo, kiu estas listigita en la mondaj rekordoj sub la propra nomo de Jean-Marc Leclerq, estas profesia kantisto de la regiono de Tuluzo en Francio, kie li konatiĝis kiel kantisto en rokbando ‘Les Rosemary Babes’ (La Rozmariaj Beboj). En 1988 li renkontis Esperanton, kaj komencis kanti en la lingvo.

Li fondis en 1996 la rokbandon 'Liberecanoj', kiu kunigis punkrokon, skaon, polkojn kaj tradiciajn slavajn muzikojn, kaj en 1998 ili eldonis la kompaktodiskon ‘JoMo kaj Liberecanoj’.

En 2001 li produktis sian unuan solodiskon, ‘JoMo Friponas’. Ĉi-jare (2006) aperis lia dua soldisko en Esperanto, ‘JoMo Slavumas’ en kiu miksiĝas muziko rusa, jida, cigana, ukraina kaj pola.

"Ni tre bonvenigos junulojn kaj aliajn el eksterlando", komentis Arturo Sly, "Ni deziras krei viglan etoson ĝueblan de ĉiuj, kaj ni invitis al JoMo ĝuste ĉar li povas vigle distri homojn de ĉiuj aĝoj kaj kulturoj".

Letchworth estas nelonge for de du flughavenoj konataj pro malaltekostaj flugoj de Easyjet kaj Ryanair: Luton (20 km for) kaj Stanstead (30km for).

[Ian Fantom (LKK - Merkatado)]